Fjórði hluti framundan

Skoðað: 2318

Fjórði áfangi hjólastólarallýsins til Skóga.

Í kvöld hefst fjórði hluti hjólastólarallýs Maríönnu Vilbergs og er frekar erfiður kafli framundan hjá þeim Maríönnu og Jón Trausta.
Lagt verður af stað frá vegamótunum við Skeiðarafleggjara við Suðurlandsveg austan við Selfoss einhverntíma á milli 18:00 og 19:00 en tímasetningar eru ekki komnar á hreint enn enda er þetta sjálfboðaverkefni og sumt af fylgdarfólkinu er í vinnu eða hefur öðrum skyldum að gegna yfir daginn og á því ekki auðvelt með að komast frá.  Haldið verður til Vegamóta þar sem Landvegur mætir Suðurlandsvegi í þessum áfanga.
Sennilega verður þetta einn af erfiðari köflum ferðarinar þar sem talsvert er um hæðir sem þarf að klífa en á móti kemur að aðeins léttir á eftir klifrið þegar hægt verður að rúlla sér niður brekkur eftir puðið.  Ljóst er þó að þessi áfangi ferðarinar tekur talsvet meira á en hingað til hefur gert og kaflinn sem farinn verður í dag er svipaður þeim þriðja í kílómetrum talið eða 13,5 km og má reikna með að ferðin taki um þrjá tíma.

Í myndbandi sem Maríanna birti eftir síðasta áfanga þakkar hún þann stuðning sem henni og félögum hennar hefur verið sýndur en skorar jafnframt á afreksfólk í íþróttum, fólk sem að öllu jöfnu ætti að vera í fanta góðu formi, að mæta austur og prófa að setjast í hjólastól og nota handaflið til ýta sér áfram til að kynnast því hvernig það er að vera fatlaður og þurfa að notast við það hjálpartæki sem hjólastóllinn er.

Það getur verið erfitt að hlusta á og skilja hvað Maríanna segir en það á sér sínar skýringar þar sem þann 1. janúar 2018 fékk hún svo slæmt MS kast að hún missti málið algjörlega, lamaðist í andliti ásamt því að nánast missa algjörlega sjón og heyrn í 28 vikur.
Sýnið því þolinmæði og skilning að hún á erfitt með að tjá sig.

Öllum sem vilja fylgjast með ferðalaginu er bent á hópinn Krefjumst betri kjara! Áfram við, öll sem eitt! á Facebook en þar verður hægt að fylgjast með ferðinni í beinni útsendingu meðan á henni stendur.

Skoðað: 2318

Umsagnir eru á ábyrgð þess sem þær skrifa

umsagnir